Dec 28, 2012

Pu Kaptea leh Yangon Mizo Society (YMS)


Kum 82-a upa  Mizo putar, a chhungte pawhin a dam leh dam loh an hriat tawh loh Rangon khawpui daifema bazaar-ah vanneih thlak taka hmuh chhuah a ni. 

Pu Kapthanga (Pu Kaptea) Mualpheng (Mizoram) khua chu, kum 1952 vel khan Burma sipai 21 infantry –ah tangin a beng that loh avangin medical board-in 1970 khan a pension a. Rangon khawpui daifem Taketa bazaar No. 3-ah dawrkaiin a khawsa a. Mahse a tlachhe tial tial a, bazaar nghaktu (vengtu)-ah te a tang a. Chu bazaarah chuan kum 30 chuang Mizo tumah pumpawlh lovin a lo khawsa a ni. Amah hi a mit a fiah lo va, a beng a chhet em em bawk a ni.

Kum 2012 September 30 (Pathian ni) a ni a, Rangon khawpui laili taka awm Presbyterian kohhran biak inah chuan rin loh tak maiin Mizo putar tawh tak mai pakhat hi tu tih hriat loh kawlho hian an hruai thleng nawlh mai a. "He putar hian Chin Lusei ka ni atih thin avangin Lusei zawnin kan rawn zawnga in biak in hi kan rawn thleng a ni. Tin, kumin kumtir lam khan a tlu a, a na viau a, enkawltu tha a nei lova, a dam lo rei hle a. Hetianga dam loh nikhuaa awmpuitu tha a neih loh avang leh a chungah a chhe ber pawh lo thleng se mawh la tur an awm loh avangin a chipuite kan rawn zawng tawp mai a ni," tiin a rawn hruaitu Taketa bazaar hotute chuan an sawi a.

A rawn hruaitute hnenah chuan lawmthute sawiin leh Yangonah Mizo Society din a ni a, kan inhre har chu a pawi hle mai, a awm dan tur chu a rang thei ang bera hma lak nghal a nih tur thute hrilh an nih hnu chuan an hawpui leh phawt a.
A tuk, Oct. 1. 2012-ah chuan Yangon Mizo Society (YMS) hruaitute chu inhmukhawmin an buai ta char char a. Pu Kapate chenna hmunah te kalin amah an va hmu a. A ID card te, pension-bu te, Mizo Bible te leh a lehkhabu dangte an enkual a, Mizo ngei a ni tih an chiang a. Amah Pu Kaptea chu an han be thin a, a beng a lo chhet nasat em avangin an be pawp hlei thei lo va. Ziak chhiar turin a mit a lo fiah lo leh zel bawk si a, a vanduai thlakin a beidawn thlak ang reng hle a ni. Mahse a hnu hma han enin pa invawng fel tak, Pathian tih mi, pa taima tak, mahnia engkim intodelh tum tlat mi a nih erawh a lang thei a ni.

YMS hruaitute chuan engtia hma lak tur nge ni ang tiin ngaihtuahna an seng nasa hle a. Internet website atang a chanchin theh darh phawt ila an tih lah chu chhanna mumal a awm thei si lo. Engpawh nise beng chhi zau zel ila, tihngaihna a awm ngang loh chuan Roman Catholic (RCM) tar chawmnaah dah mai ila, chuta a rem lo a nih chuan Presbyterian (PCM) children home-ah dah mai ila, tiin a ngaihtuah a.

2012, Oct. 13 zan a lo inher chhuah meuh chuan Pathian a rawn inrawlh ta! Vengpui veng zan tawngtai inkhawmnaah chuan, bengdar leh tarmit siamsak phawt ila, chuta tang chuan kan inbe pawp thei ang a, a khua leh a unaute, a thian sipai bangte pawh kan hre thei ang. Bengdar leh tarmit siamna tur thawhlawm khawn turin Pathian hnenah i hlan phawt mai teh ang," an ti ta a. Chu inkhawmah chuan cheng nuai thum dawn lai mai hmuh nghal a ni a, a lawmawm tak zet a ni.

Ni 14 Oct. 2012 a ni a, Pu Kaptea hre chiang em em tu, sipai bang Pu Ngurbiaka chu Pastor Lalchuka'n a lo kawm fuh hlauh mai a. A hnen atang chuan an khua leh a pianpui unaute chu hriat theih a lo ni ta a. Pu Ngurbiaka leh a u Pu Chhawntluanga te chuan Pu Kaptea tan cheng sing khat ve ve an thawh nghe nghe a ni.
Pu Kaptea chanchin thar chu internet-ah theh darh leh a ni a. Pu Kapte tupa Tv. Rema Hnamte, tuna Nepal rama missionary ni mek chuan Rev. Hrangzuia thehdarh fb.website atangin a lo hmu fuh hlauh mai a. Tichuan chiangkuang taka indawrna chu kalpui theih a lo ni ta a. Mualphengah a zan a zan chuan chhungkaw inhmuhkhawmna te an nei nghal a, dar 11:00 bawr velah telephone hmangin Rangon lam nen an inbepawp thei ta a. Mizoram, an khua ngeia a haw thlen theih an duh thu te, mitthi tho leh tluk hiala an ngaihthu te an sawi a. YMS lam pawhin an duh dan tihhlawhtlin sak ngei an tum thu leh Pu Kaptea bengdar leh tarmit siamsak phawt an tum thute pawh an hrilh ve nghal a.

Ni 27 Oct. 2012 zingah Khawzawla RO Pu Zatluanga chuan a rawn bia a, a tupa a nih thu leh a haw kawng turte a rawn zawt a, Yangon Mizote chunga an lawmthu a rawn sawi mawlh mawlh bawk a. 

Ni 28 Oct. 2012ah Tahan Thalai hruaitu Pu Engzauva dawr a ni a, ani chuan Tahan atanga Mualpheng thlenga thlah an inhuam thu a sawi a, thla a muang hle mai. Mahse ruah tui a la tam deuh avangin, Tiau kawng a la tha zan lo a, November thla lai hawl vela kal thlakpui chu a tawk chauh ang tih thu a sawi bawk a. Rangon atang Tahan hi mel za tam taka hla a ni a.
Yangon Mizo Society chuan Pu Kaptea chu thlawhna ngeia thawlh hawtir a tum a ni.

A khat tawkin Pu Kaptea chu YMS chuan a va kan ziah a. Pu Vanlaldinga te chhungin thosilen thar an pe a, thenkhatte chuan a hak turte an pe bawk a. Thenkhat te chuan a thawmhnaw an suksak bawk a. Rangon Mizoten an theih ang tawkin an hmangaihna an lantir a. Pu Kaptea pawh a ni telin a hmel a hlimin, a eng tulh tulh a. Pu Hrangliankhuma nen a pension transfer buaipui a ni a, mahse thla 6 danah vawi khat amah inlan a ngai an lo ti a, beisei a bo chu a ni.

Pu M. Lianzuala, Pu Hrangliankhuma, Pu Vanlaldinga ten amah hruai chhuakin a bengdar siamsak a ni a, a mit pawh  entir a ni a, a mitnaute a that tawh loh avangin tarmit siamin awmzia a neih loh thu Doctor-in a hrilh a, bei a dawng hle mai.
Ni 10 November, Inrinni zinga YMS hruaituten an va tlawhin bazaar hotute nen office-ah inkawmna an nei a, Pu Kaptea hnenah chuan a haw thuai thei tawh dawn tih an han hrilh chu a hlim em em a, Mizo kan ni tih a hre tawh bawk a, office chhungah chuan, "Ka tho anga ka pa hnenah ka kal teh ang," tih hla Rev. Hrangzuia thiannu Pi Malsawmi nen an han sa chu, a hlim em em a. Bazaar Office hotute chuan heti anga hlim taka hla a sak kan la hmu ngai lo an ti hial a ni.

Ni 11, Pathianni zingah YMS hruaitu Upa Ralkapthanga ten an va hruai a, inbual fai hnuin chawhlui an kilpui a, Biak inah an inkhawmpui a, Mizo heti zat zat a hmu chu mak a ti hle a, an hlasakte chu "ka rilruah a cham reng" tiin a hnuah Pu Ralkapthanga a hrilh nghe nghe a ni.
Ni 13 Nov. 2012ah chuan YMS hruaitute Upa Ralkapthanga, Rev. Hrangzuia te nupa, Pu M. Lianzuala, Pu Zothangliana, Pu Hrangliankhuai, Pu Hmangaiha leh Pu Vanlaldinga te chu Pu Kaptea hruai turin an thawk a. Nimin lamah bazaar dawrkaite chuan Pu Kaptea tan thawhlawm an lo khawn a, nuai khat leh sing hnih chuang an hmu a. Bazar office-ah inthlahna leh thawhlawm inhlannate an hmanpui a. Hetia Pu Kaptea an hmangaiha an duhsak em em mai hi a lawmawm mai ni lovin duhsak phuin a awm a ni tih min hriattir hial a ni. Pu Kaptea chuan a chenna hmun chu a kalsan dawn ta tih a hria a. "Kan inhmuh kan intawh leh hma zawng" tih hla kha hlim takin a han sa a, amah ngainatute chuan mittui nen chibai an rawn buk sap sap a, anin mal a lo sawm zel a. Hotute a chibai zawhin kum tam tak a lo chenna bazaar hmun chu kir leh tawh lova chhuahsan hlen turin a insiam a. Tichuan hlim tak leh hreh em em chungin kum rei tak a lo chenna hmun bazaar chu a chhuahsan ta a ni.

Hlimna Ni Ropui Chu A Eng: Mi bote hruai kir thintu Pathian chuan, a haw hun tur ni leh thla chu a rawn her chhuahtir ta le!! Ni 14 Nilai zing 4:30 a ni a, thawhphan pawh awm lovin Pu Kaptea chu Rangon Airport lam pan pui a ni a. A hlim em em a, kawng tluanin "Hlimna ni ropui chu a eng" tih hla kha a sa a. Tawngtaina pathianin a chhang a, airport chhung a security a pelh thlengin YMS Secretary  Upa Ralkapthanga ten an va thlah thei a. Thlawhpui tur duhthusama tha an va hmu bawk a. Tichuan hlim tak leh thlamuang takin zing dar 7:15ah Tahan lam panin a thlawk chhuak ta a. Mi tlawmngaite thawhlawm cheng 220,000 (nuai hnih chuang) a hawn bawk a.
Tahan Thalai hruaitute chuan Airport-ah Tahan Zawlbuk motor-in an lo hmuak a, a sipai laia a nambari (fam) te inah a thleng a, a nupui leh a fate chuan mittui nen an lo hmuak a. A tuk ni 15 zingah Thalai hruaitu Pu Engzauva leh Pu Neihrima te chuan Tiau thlengin tlawmngaiin an kalpui ta a. Zokhawtharah Mizorama a chhungten an lo hmuak a, Champhai lama YMA hruaitute pawh an tel a, Camera leh video-in thla te pawh an la nasa hle a ni awm e. 

A damlai ni la awmte hlim takin a tu leh fate nen hmang chhunzawm sela tiin thinlung taka duhsakna nen Yangon Mizo Society chuan a thlah liam ta a. A chanchin sawi erawh kan bang tawh long e. 

(He thu hi "Zonun News Letter" a mi Upa Ralkapthanga YMS Secretary ziak lak chhawn a ni a, a ngaihnawm tur zawng nia ka rin danin ka edit a ni. Pu Kaptea nasa taka buaipuitu Upa Ralkapthanga leh a thawhpui YMS upa te leh YZTP hotute an fakawm ka ti tak zet a. Tahan Thalai hruaitute pawh an bang bik lo. Pics hi "Zonun Group Mail" ami ka lak a ni. Pba).

Israel-in Ephraim hnam bo zawn leh hruaikir hna nasa takin a bei a. Tuna Yangon Mizo Society-in Pu Kaptea a buaipui dan hi fakawm ka ti tak zet a. A mit leh beng that  tawh lohna avangte hian mahni chaknaa mizo zinga khawsa leh tur pawha beisei bo, a chhungte hnen ngei hruaithleng tura Mizo tlawmngaihna mai pawh nilo hmangaihna an lantir hi a ropui tak zet a ni. Tin, he tiang hi kan mizo chanchina la awm ngai zen zen lo a ni a. Rangon mizote chanchina thil chhinchhiah tlak leh hriat nuam tak a ni kumkhua tawh ang. "Ka tho anga ka pa hnenah ka kal teh ang," tih hla hlim taka a sa lai hi hmuh ve ka chak hle mai. Awm ve ila chuan ka hnuk a ulh teuh theiin ka ring.
Rangon-ah hian hetianga mi bo zawn tur hi kan la awm zeuh zeuh mai thei a ni. Mizo sipai nupuite hnam dang ni si, an fate hnam dang kara pil bo ta mai mai, mizo thil tihnaah pawh tel ngai tawh lo, mizo tawng, nun leh zia hre lo hi eng zat tak awm ang i maw??? YMS & YZTP hian tan han zel thei se a va duhawm tak em!!

A hnuaia hi 

Pu Kaptea Hmuahna Mualphenga han tel ve Pu Vanneihthanga Vanchhawng post ami paragraph khat chauh ka rawn tarlang e.

Pu Kaptea buaipuina kawngah hian Yangoon Zo Thalai pawl (YZTP) leh Mizo welfare te an tangkai takzet a, an inpekna hi entawntlak a tling. Pu Kapthanga pual hian vehbur an khawn a, Burma pawisa in nuai 3 leh sing riat lai an khawn khawm a, thlawhna ticket an lak sak a, a awh em em sana an leisak a, bengdar tha chi German siam an lei sak bakah Bible a chhiar nan enlenna thatak mai an leisak bawk a ni. Rangoon atangin an rawn hruai thla a, Nimin piah 15th November 2012 tlai dar 5:30 vel khan Zokhawthar an rawn thlen pui a, Zokhawtharah hian a tu ten an lo la chhawng ve leh ta a ni.