Feb 21, 2010

Hming Sak

Vawiin chu ka fapa hming ka saa, sak chhan tlem ka rawn sawi teh ang.

Tunhma kan pi pute hming sak chhan kha an nitin nun leh khawsaknaa an thil tawn nena inhmehin an sa nasa a. Tunlai atanga teh chuan Hming mak pui pui te pawh a tam ang reng hle a ni. Tunah chuan hming koh nuam leh mawi, tin Kristianna lam hawi hi a ni ta ber a. Mahse hming hian awmzia pawimawh tak a satu tan leh a sakchhan atan a nei a ni. Mizote hian Mihring hming hi “Phuah” ni lo vin, Sak (sa) an tikher thin hian, mihring hming sak an ngaihpawimawh zia a lantir nitein ka lo ngai ve ngawt bawk a. Pa pakhat pawhin fanu a nei a, an kawmthlanga fartuah kung chu naute hmingah a phuah chhan duh si a, ti chuan a fanu hmingah chuan “Kawmtuahi” tiin a sa e, an ti (fiamthu).

A.. kan Pathian pawh khan hming hi a ngaipawimawh a niang Jakoba pawh Israel-a tiin a thlak a. Hming sak chungchanga kan pipute ngaihdan hi ril zawka hriat a chakawm hle mai. Lal hlau lo hming te pawh kha mirethei leh hnamchawm te chuan an fate hmingah an hmang thin a. Kristaina kan luh hnuah erawh chuan “Lal” tih hi kan pu deuh ta fur mai a nih hi. Kan Kristian sakhua hian hei hi a ken tel em ni chu tih theih tak a ni.
A ziak dan chungchangah keini mizo te chuan kan hming hi kan ziakzawm thin a. A thenin hming hnungah hnam hming an telh a, a thenin hming hmaah hnam hming lamtawi kan dah a, hnam hming dahkher lo pawh a tam zawk an ni. Heng hi kan tihdan tlawnlawn deuh ber chu a ni.
Western ho tihdan hi kan copy zel si a, document leh lehkha pawimawhah Hming fill up a tul chang hian First, Middle, Last name tia ziah a lo tul leh thin a. Keipawh ka hming hi ka ziak zawm vek a, Philippines ka awm lai khan lehkha (form) vel han fill up hian I Last name enge tih zawhna hi ka dawng reng mai a, mak an ti thin hle a ni. Hnam dangte tih ang hian Hming kan sak hian Last name turte hi titel sa ve ta thlap mai ila, kan mizo lo phah viau lem dawn em ni? Kan International deuh zawkin ram dang nen kan inpawh tawnna kawngah hian lehkha pawimawh vela hming ziak a tul chang hian zawhna kan dawn fo loh phah deuh chuan a rinawm. Ngaihdan erawh a inang vek lem lo ang le.

Vawiin chu ka fapa hming ka sa a, kan biak inah a hlanna tawngtaina leh thingpui ruai te kan kil ho ka hlim ve khawp mai. Ka fapa hming ka han puang chu thenkhat lo rin dan chuan Van lam hawi deuh a nih an ringa, banah kan sawi ho nak nak a. Mahse mahni identity lang thei zawng turin ka fapa hming chu ka sa ta a ni. Sawifiah vak dawn chuan a thui em a, a tawi zawngin sawi mai ila. Ka fapa hmingah chuan Chawngchhingpuia Lalau tiin ka sa ta a ni. Chawng tih hi chu hnam hming (chawngthu) atanga lak a ni a. Chawngthu in chhungah chuan “Chawnga or Chawngi” ti ila pakhat tal eih tur an awm zel an tih kha. Chhing tih hi kan pu Thangzachhinga (Vanapa) hming a tang leh Aizawla ka patea (Chawnglianchhinga) hming atanga lak a ni. Pui tih hi chu ka hming leh ka nupui (Zonupuii) hming atanga lak a ni. Tichuan Lalau tih hi ka pa Lalauva hming atanga lak a ni a, hei hi ka fapa hian a last name atan a hmang anga, Pathian zarah thing delh loh, lung delh lohva a lo seilena tu leh fa te a lo neih hunah pawh an Last name tur a ni zel tawh dawn a ni.

Feb 9, 2010

Fapa ka nei ve ta

Ka awh em em leh Pathian hnenah pawh ka lo dil ve fo thin, Fapa duhawm tak ka nei ve ta a, ka lawm em a vangin ka blog-ah hian ka han thai lang ve a ni e.
Ka blog-ah lo leng lut thin online thian tha tak takte, ka nupui leh naute tan min lo tawngtai pui ve zel turin ka sawm a che u. Naute leh a nu pawh Pathian zarah an tha a, mahse a nu hi an thui-na hmuamhmate a dam thuai thuai theih nante min lo tawngtai pui ve zel dawn a nia. Tawngtaina lam han sawi takah chuan March thla chhung hian Tahan lamah rawngbawlna nei a zin ka tum a, in tawngtainaah min lo hraitpui ve chuan ka lawm ngawt ang.
Thlalak pawh tilan a changawm viau nan, kan ram atang hian blog hi direct-in kan access ve thei lo va, by -pass a nih vang nge, thlalak post-na tur ang chi kha a awm ve ta tlak lo mai.