Dec 17, 2008

Saitea ka tuarpui ve nan


Saitea hi Tahan khaw bul lawk Tuivar khaw chhuak a ni a. A naupan lai leh a tunhma nun chu hre lo mah ila, Rangona Bible school a kal lai leh chu mihnua Bible schoola lecture hna a thawh chhung hian kan in hi inpui berah neiin ipte pui bannan a rawn hmang a. Kan venga an kohhran pakhat Karen ho zingah thu sawi tura a rawn kal changte leh hun awl a neih changte hian kan inah a rawn riak ve thin a. Heng atang hian kan inhre chiangin kan innel em em a. Tin amah hi ka nupuia chhungte a ni a, khatih lai khan kum 20 a tling awrh chauh va, a kum phu lovin a nungchang leh chetzia a puitling ka ti rilru hle thin.


Unau pianpui mipa pakhat a nei a, a unaupa hi pianphunga rual ban lo a ni hlauh mai, tichuan a nu hian an unau hi theih tawp chhuahin a tulpui ta thak a ni. kawlphai eizawn harsa tak karah bazarah anhnahte zuarin leh chhangte kangin Saitea te unau chu a finna leh a theihna zawng zawng nen a enkawl seilian a. Saitea B.Th a kal chhung zawng pawhin a school kalna turte thawk chhuakin nu mawlte mah nise, a fapa lo inzirchhuahna tur chu ngaihpawimawh berah a nei a. Hetianga a nuin a enkawlna zawng zawnghi Saitea pawh hian a ngaihlu thiam em em a.
Saitea chuan B.Th a zawh hnu chuan zir chhunzawm chu chak hle mahse, a nu hah taka amah enkawl nana a thim a var thlu lova rim taka thawk thin chu chhawk zang khai theihna a ngaihtuah hmasak a lo ngai ve ta a. Tichuan Bible school zirtir hna chu thawk nghalin kum 2 a hun a hmanga, mahse Bible school zirtirtu hlawh chu a bei tham em a vangin a zir leh zelna tur chu sawi loh a nu pawh duh angin a enkawl thei lova. Engpawh nise ram dangah inhlawhin intuak ve phawt ila Pathianin a zirchhunzawmna tur chu tul a tih chuan a la ngaihtuah mai ang tiin duh thlang thei ni pawha inhre lovin, Gatar lamah inhlawh tur chuan a kal ta a.


Gatar-ah chuan construction hna thawkin ni sensa hnuaiah pawh rim takin a thawk a, engemaw chang chuan khawlum nen an hna hau tak nen haw mai a duh thute, an hlawh lah a chu ti teh lua bawk si loh thute pawh min hrilh thin a. Mahse a haw ringawt chuan ram dang kal chhuahlehna turin sum tam tak sen that leh a ngai dawn si tiin chhel takin a awm ta zawk a. Kum 2 lai a vei hnu chuan hotute duhsakna dawngin a hnaah pawh nihna sang leh nuam zawk a luah chho ve ta a. A hlawh pawh tlemin a hma aiin a lo zia awm chho ve tan thute hi sawi nuam a ti ve em em thin a.
Tichuan Rangon khawpui fem deuhah inhmun pakhat tal suan ve theih ngei tumin a theih ang angin a inkhawl ve bek bek a. A nuin mamawh tul a sawi reng reng hi chu a theih ang tawka tihhlawhtlin sak a tum tlat a, a nu lo enkawlna zawng zawng hi a theihnghilh ngai lo. “Ka nu hi ka tan chuan ka pa a ni bawk a, he khawvela ka lei rohlu, ka neih chhun a ni tak meuh meuh a ni,” a ti thin.

Tichuan kum 2009 kum thar hian kawl ram lamah mimal pawimawh leh chhungkaw pawimawh te titurin haw turin a inpuahchaha, chutia mahni pianna khua leh a hmangaih em em a nu hmu tura nghakhlel taka kum lo thar mai tur a thlir mek laiin chanchin lungchhiat thlak tak mai chuan a rawn deng ta a ni. A ngaihsan em em leh a hmangaih, ram danga hah taka hna a thawh phah hialna chhan; a chun nu duh tak mai chuan kum khuaa he khawvela inhmu leh ngai tawh lo turin chatuan ram a lo pan san ta thut mai a ni.

Saitea nu Pi Hrangsungi hi kum upa lam a ni ve tawh a, tin thisen sang natna nei a ni a, a thih chhan chiah hi hemi ka ziah lai hian ka hre lova, ka thu hriat dan chuan, a thiannu an ina va leng chuan inbual ina tlu renga a lo awm chu a hmu a, kaihthawh tuma a va kal hnaih chuan kaihthawh tur a lo awm tawh lo a ni.

Pi Hrangsungi (Tuivar khua) boral thu hi Dec. 15, 2008 khan ka nupuiin min rawn mail a, ka hriat veleh Saitea chu email ka thawn nghal a. Ka nupuiin, “Saitea chuan a nu ruang ni hian hna a thawk a sin, a hre si lova,” tih thu min hrilh chuan ka lainat lutuk hi ka mittui a tla zawih zawih a. Theih nisela chuan kan hmangaih leh mahni pianna nu ngatte hi chu mahni ngeia dawmhlum kan duh thin nen.

Tuanna tlang dang vang ngawt pawha lunglen a nat vei nen, fam ngaih lunglen meuh zawng lairil a fan thleng tak meuh meuh a ni. Kan zonunmawi leh khawhar hla hmanga min awihpuitutur awm lohna hmunah phei chuan kan mal ngawih ngawiha, kan riang ngawih ngawih hian a hriat a, thenrual min hnemtutur kan mamawh tak zet zet a ni. Keipawh ka fanu min boral san lai te kha ka hre chhuak rum rum mai. Kan ram mi leh kan hnam tumah an awm si lo, mahni chauhva, prayer roomah khawhar taka ka tah tlaivar zan kha, a changing khawhar hla ka thiam lai lai zawi te tein ka saa, ka tawngtai reng bawk a.

Saitea tuar nat dan tur zia te ka ngaihtuahin thlamuanna thu nena han hnem theih ka duh hle a, vanneih thlaktakin kan inbe pawp thei hlauh mai a. A tuarna hle tih chu ka hai lo mahse, patling takin a awm a ni tih ka hriatin ka lawm khawp mai. Chutah a nuin a lo enkawl tawh dan te min hrilh a, a sawi zelnaah, “Ka nu hian khawvela a tih tur kim tak leh fel takin a hlen a, ama hrehawmna pawh sawi phal lovin kan unau vin min enkawlin min tuamhlawm a, ka ngaisangin, ka lawm tak tak a ni. Mahse ka u hi rual ban lo a ni si a, zing a han tho anga, ka nu lo awm tawh lo tur leh unau dang awm bawk si lo chu a mang ang dawn em hian ka hria a…” tiin lungchhe takin min hrilh a. “Tin, ka nu min boral san chungchangah hian lawmna ropui tak mai ka neia, kan fahrahna lang miah lova kan khawtlang leh thenrual tha ten min bawisawma, tuarpuina thu nen min hnemna zozai hi ka phu lovin, a ropui tak tak a ni,” tiin khawtlang leh thenrualte chunga a lawm zia chu a sawi mawlh mawlh bawk a ni.

A tawpah chuan ka thiam tawka Pathian thu nen ka hnemna chu he ti hian min chhang a, “Isawi hi tunhma atangin ka lo ngaituah fo tawh a, kan nun hi keini thu a ni lova, Pathian thu a ni tih hi ka ring tlat a, chu chuan min tithlamuang khawp mai,” a ti a. Ni e keini ringtu tan chuan thihna hi kan tawp hlenna a ni lova, chatuan hmunah kan la inhmu leh dawn a ni tih kan ring tlat a, hei hian nasa takin min hnem fo thin a ni.

Khawhar chhungte Lalpa’n thlamaun zel rawh se.

No comments: